موقف مظحك و نصبة على بنت
اترككم مع القصة...........
هحكيلكم القصة بس احتمال تطول شوية .. هى قصة حقيقية .. حصلتلى مع اعز واغلى صديق
كالعادة ايام الجامعة لما بنخلص بنخرج مع بعض او ساعات مبنحضرش وبنقضى اليوم من اوله
ايام تقريبا زى بعضها لكن عمرنا ماحسينا بالملل
فى يوم كان مختلف .. وماتقابلناش لان صاحبى راح مشوار وانا كنت مشغول
هو بيحب يركب مترو الانفاق .. تقريبا بيلاقى فيه نفسه ..
نفس اليوم كلمنى وقاللى انا اتعرفت على واحدة فى المترو وخدت رقم تليفونها وهقابلها تانى
طبعا انا عارف صاحبى بيحب يهزر كتير لانه مش كل يوم يعرف واحدة
المهم .. انا سمعت القصة وخلاص .. كلمنى تانى يوم وقاللى انه خرج معاها وكان يوم حلو
ــــــــــــــــــــــــــــــــــــــــــــ
وفى يوم .. انا وصاحبى
اخدنا اجازة وفكرنا نطلع يوم اسكندرية صد رد يعنى نروح ونرجع فى نفس اليوم
واتقابلنا وكانت المفاجأة ان البنت اللى اتعرف عليها اتفق معاها برده انهم هيروحوا اسكندرية سوا
لكن ماقلهاش ان انا جاى وماقاليش برده ان هى جاية
قابلنا ببعض والصراحة استغلست ذوقه.. هى كانت شبه نجوى كرم .. مش وحشة ومش حلوة
ركبنا القطار وقعدنا مع بعض اتكلمنا وضحكنا لكن كان معظم كلامها معايا مش مع صاحبى
وصلنا اسكندرية .. وركبنا تاكسى من المحطة لغاية الشاطىء
وهناك قعدنا احنا التلاتة
طبعا انا كنت مسترخم الموقف .. ازاى انا اقعد مع واحد صاحبى وحبيبته .. دى حتى شكلها مش حلو فى حقى
بعد شوية صاحبى قال ياللا ننزل البحر ..
انا ماكرهش شىء قد البحر الصراحة .. عشان مش بعرف اعوم
انا رفضت بالتأكيد .. واخد البنت ونزلوا سوا
قعدت انا اسمع مزيكا واتأمل منظر البحر المرعب ده
5 دقايق والبنت رجعت لوحدها .. وقعدت معايا كأنها تعرفنى من سنين
اخدت منى الوبايل وطلبت رقم
والتاريخ كان 9-13 فهى افتكرت ان الساعة واحدة و9 دقايق .. هههه ..
انا طبعا مش فى دماغى الساعة ولا الحوارات دى انا عايز اعرف هى ليه خدت الموبايل وقاعدة بتطلب فى ارقام
المهم .. سابت الموبايل وقعدت تتكلم وتسألنى فى شوية اسئلة .. واللى لاحظته انها بترسم عليا .. !!
رجع صاحبى ولقيت على وشها كلام فيما معناه انت لسة ماغرقتش !!
خلص اليوم ورحنا عشان ناكل ونرجع تانى فى القطار ..
وفى القطار سبتهم انا مع بعض وقعدت بعيد لكن كانت كل شوية ترفع راسها وتبص عليا
بينى وبينكم انا حسيت ان صاحبى خد باله .. وانا الصراحة ماكنتش راضى عن موقفى واللى هى بتعمله ده
وصلنا القاهرة
نزلنا .. مشينا .. البنت اخدت تاكسى وراحت بيتها وانا فضلت مع صاحبى شوية وبعدين اخدت تاكسى وروحت
وانا فى التاكسى لقيت الموبايل بتاعى بيرن !!
رقم غريب
ألو ..
أيوة يا احمد انا غادة
انا استغربت .. وساعتها عرفت انها كانت بتطلب رقم الموبايل بتاعها عشان تسجل نمرتى
ايوة يا غادة .. وطبعا كنت بضحك ع الموقف
قالتلى انا طلبت نفسى من تليفونك عشان اعرف اذا كان شغال واللا لا لانى كنت سايباه فى البيت
قلتلها اه ولا يهمك .. انتى وصلتى .؟
قالتلى اه وحبيت اطمن عليك
انا قلت فى بالى ايه البت الواقعة دى؟!!
طبعا لو كانت ملكة جمال العالم مستحيل اخون صاحبى عشانها
اتصلت بصاحبى وحكيتله القصة .. وقلتله انا هاخدلك حقك يا صاحبى ..
قاللى ازاى ..؟ قلتله انا عايزك تكلمها عادى خالص وماتحسسهاش ان انت عرفت حاجة
قاللى حاضر
قلتله انا هخليها تندم على اللى هى عملته ده
فات يوم واتنين والبنت كل يوم تكلمنى وتكلمه .. زى ماتكون بتختار ..
فى يوم جاتلى رسالة منها وكان مكتوب فيها (انت بتحبنى؟)
انا استغربت.. بالسرعة دى؟
اتصلت بيها وزى مالخطة كانت بتقول انى اجاريها عشان اعلمها درس
قلتلها انا بحبك فعلا وحاسس ان انتى كمان بتحبينى
قالتلى الصراحة انا مكسوفة .. خصوصا ان صاحبك بيحبنى وانا مش عارفة اواجهه بالحقيقة
واقوله ان انا بحبك انت ..
قلتلها لا لازم يعرف لان انا مقدرش استحمل الموقف ده ومقدرش اغش صاحبى
قالتلى طيب انت قول لصاحبك .. قلتلها حاضر
قفلت معاها واتصلت بصاحبى وقلتله الخطة ماشية عال
قاللى تمام .. دى حتى لسة بتتصل بيا ولا كأن فى حاجة
قلتله .. بكرة انا هقابلها فى ماكدونالدز بتاع شارع الاهرام – مصر الجديدة
استنانى هناك وماتدخلش الا لما اديك اشارة
وفعلا تانى يوم بالليل اتقابلت انا والبنت هناك ..
ونزلت عليها المفاجأة لما شافت صاحبى جاى يشاركنا الترابيزة
طبعا البنت وشها جاب ألوان ..
قلتلها انا جبته النهاردة عشان اقوله ان انا وانتى بنحب بعض
بس اللى انتى ماتعرفيهوش .. انه عارف كل حاجة ..
واحب اعرفك ان انا مش بحبك ولا هو بيحبك ..
اللى انتى عملتيه غلط .. ولازم تتعلمى انك ماتحطيش نفسك بين اتنين اصحاب تانى
البنت خدت شنطتها وجريت ..
وانا وصاحبى لسة اصحاب لغاية دلوقت ..
ارجو ان تكونو قد استمتعتم بالحكاية...........
ولا تنسو الردور.........
